नव्या सरकारच्या मंत्रिमंडळात बदलांची शक्यता, शिंदेंच्या सेनेकडून मंत्री राहिलेल्या ‘या’ दोन नेत्यांना मिळणार डच्चू?

NewsZenn Dec 9, 2024 324 0

महाराष्ट्राच्या नव्या सरकारच्या मंत्रिमंडळाची लवकरच घोषणा होणार असून, या वेळी मोठ्या फेरबदलांची शक्यता आहे. शिंदे गटाच्या शिवसेनेतून मंत्री असलेल्या अब्दुल सत्तार आणि संजय राठोड यांना नव्या मंत्रिमंडळातून डच्चू मिळणार असल्याचे बोलले जात आहे.

प्रगती पुस्तकात दोन मंत्री नापास?
शिंदे गटाने तयार केलेल्या संभाव्य मंत्र्यांच्या प्रगती पुस्तकात सत्तार आणि राठोड हे दोन मंत्री नापास ठरल्याचे सांगितले जात आहे. त्यामुळे त्यांच्या जागी नव्या चेहऱ्यांना संधी मिळणार आहे. यापूर्वी मंत्रीपद भूषवलेल्या गुलाबराव पाटील, शंभूराज देसाई, उदय सामंत, तानाजी सावंत, दादा भुसे, आणि दीपक केसरकर यांची नावं मंत्रिमंडळात कायम राहण्याची शक्यता आहे.

नव्या चेहऱ्यांना संधी:
संभाव्य मंत्र्यांच्या यादीत भरत गोगावले, संजय शिरसाट, प्रताप सरनाईक, अर्जुन खोतकर, आणि विजय शिवतारे यांची नावं समाविष्ट असल्याचे समजते. लाल दिव्याच्या अपेक्षेने अनेक आमदार मुंबईत तळ ठोकून आहेत, त्यामुळे मंत्रिमंडळ वाटपावेळी प्रमुख नेत्यांना नाराजीचे गोडवे घालावे लागणार आहेत.

शपथविधीची तयारी सुरू:
येत्या 11 किंवा 12 तारखेला नव्या सरकारचा शपथविधी होण्याची शक्यता आहे. त्याआधी तीनही गटांना आपापल्या संभाव्य मंत्र्यांची यादी सादर करावी लागणार आहे. हे फेरबदल राज्याच्या राजकारणाला कसा आकार देतील, याकडे सगळ्यांचे लक्ष लागले आहे.